阿仙奴派5蛋代價大　兩主將受傷或無緣鬥利物浦

周日(24日)凌晨英超，阿仙奴主場以5比0大勝新升班球隊列斯聯，新加盟前鋒約基利斯梅開二度，吐氣揚眉，但兵工廠亦付出沉重代價，兩位主將馬田奧迪加特、布卡約沙卡勇戰受傷，情況唔樂觀，好可能缺陣下場英超作客上季冠軍利物浦。

開賽初段，列斯聯曾有1次入波黃金機會，中堅柏斯高史杜爾克迎頂角球，被門將大衞拉耶神勇撲出。之後成為阿仙奴嘅世界，34分鐘祖利安添巴頂入角球打開紀錄，呢位荷蘭國腳傳畀布卡約沙卡射成2比0。

換邊之後，輪到約基利斯表演，左路快放盤球帶入禁區大位起腳射入，今季聯賽開齋。跟住兵工廠又利用角球攻勢，製造門前混戰，由祖利安添巴射入，呢位右後衞今仗入2球及1次助攻，表現非常搶鏡。

阿仙奴另1個亮點係新星麥斯杜文後備入替，以15歲零235日成為英超史上第2年輕上陣球員，僅次於隊友尼華尼利2022年創下嘅紀錄(15歲零181日)。麥斯杜文不負所望，臨完場前博到12碼，由約基利斯主射入網，贈對手5蛋，開季2戰2勝。約基利斯上場對曼聯，連1次射門都冇，今仗有2球進帳，展現身價。

不過，阿仙奴贏波代價非常大，隊長馬田奧迪加特上半場38分鐘傷出，賽後領隊阿迪達表示，呢位中場肩膀受傷，需要接受進一步檢查，先至知道要抖幾耐。至於翼鋒布卡約沙卡腿筋受傷，踢到53分鐘離場，加上早前夏維斯重傷長抖，兵工廠開季踢2場已有3位主力受傷，下周日(31日)晚作客利物浦，面臨重大挑戰。

阿仙奴亦有好消息，正式宣布簽入水晶宮進攻中場伊比爾治伊斯，佢獲得10號球衣，呢位27歲英格蘭國腳今場開波前入場同球迷見面，有望出戰利物浦，佢加盟總算係一場及時雨。