展現身價！約基利斯「寸爆」慶祝動作反擊批評

阿仙奴喺英超大勝列斯聯5比0，新加盟前鋒約基利斯終於展現身價，射入2球，並做出「梳理頭髮」慶祝動作，反擊球迷寸佢上輪對曼聯，踢到冇影，撥頭髮次數多過觸球次數。

約基利斯過去2季為士砵亭上陣102場入97球，被捧為「神鋒」，引起各大豪門爭奪，最終阿仙奴今夏斥資6,300萬鎊(約6.6億港元)轉會費收購佢。不過，呢位27歲瑞典國腳首輪英超對曼聯，表現令人失望，連1次射門都冇，不時撥頭髮，似乎關心髮型多過比賽，遭到大量球迷及網民批評，指佢該仗撥頭髮次數多過觸球次數。

約基利斯今場立即以用動反擊，射入2球，當佢補時主射12碼入網後，除咗做出招牌「蒙面」慶祝動作之外，亦專登對住電視台鏡頭「梳理頭髮」，明顯回應批評者聲音。

賽後約基利斯話：「無論幾時都會有壓力，我知道自己入波只係時間問題，今場入2球，球隊贏5比0，係美好日子，至於『梳理頭髮』是否反擊批評？可能係啦。」約基利斯重拾射門鞋後，入波應該陸續有來。