換走「黑腳福」　巴塞落後兩球立即反勝

周日(24日)凌晨西甲，上季冠軍巴塞隆拿作客利雲特，幾乎陰溝裡翻船，上半場落後2球，教練費歷克當機立斷，換走表現低迷嘅拉舒福特，果然立竿見影，巴塞隆拿下半場連入3球，反勝3比2，保持開季2戰2勝。經此一役，恐怕「黑腳」拉舒福特未來賽事好難再擔任正選。

巴塞隆拿實力遠勝對手，但攻門效率令人不敢恭維，多次浪費入球機會，反觀利雲特往往一針見血，開賽15分鐘由艾雲羅美路射入打開紀錄。巴塞隆拿隨即加強攻勢，包括費倫托利斯勁射中楣彈出，拉芬夏比洛尼頭槌僅貼柱出界。

巴塞未能扳平之餘，上半場補時，左閘阿歷斯巴迪禁區內犯手球，被判罰12碼，利雲特由荷西摩拉利斯主射入網領先2球。

下半場一開波，費歷克立即換走拉舒福特，由丹尼爾奧莫入替，7分鐘之內分別由柏迪、費倫托利斯各建一功扳平2比2。戰至補時，拉明耶馬右路傳中，利雲特中堅艾基沙巴爾爭頂，反而擺烏龍，造就巴塞隆拿驚險全取3分而回。

巴塞隆拿今仗之所以陷入苦戰，有分析指主帥費歷克太輕敵，搵拉舒福特擔任正選，呢位曼聯借將除咗開賽4分鐘，個人突破1次射門之外，其餘時間踢到隱形，猶如打少1人。幸好費歷克知錯，及時換走「福仔」，否則能否反勝都成疑問。費歷克吸取教訓後，未來賽事應該唔敢再用呢位「黑腳」擔正。