咪又一樣！坦哈格德甲首戰輸波

前曼聯主帥坦哈格今夏成為利華古遜教練之後，仲未黑完，周六(23日)晚首度領軍出戰德甲，主場領先之下，以1比2倒輸畀上季護級份子賀芬咸，1.37倍主W大熱倒灶。身為「記者會贏家」嘅坦哈格罕有認衰，指利華古遜表現唔及對手。

上季德甲亞軍利華古遜今夏經歷「大地震」，昔日冠軍教練沙比阿朗素及多位主力離隊，坦哈格今仗用19歲前鋒伊巴謙馬薩擔任正選，原本開局唔錯，開賽6分鐘，由利物浦來投嘅中堅查洛爾昆沙接應罰球頂入打開紀錄。

賀芬咸好快憑前鋒費斯歷阿斯蘭尼窄角度射入扳平，雖然利華古遜之後創造唔少具威脅攻門，但都被演出神勇嘅賀芬咸門將奧利華包文化解。

換邊之後，賀芬咸前鋒林派利遠射入網，協助球隊反超前2比1，其後利華古遜有1次黃金機會，但尼敦迪拿射中網側，注定全失3分。

賽後坦哈格話：「我好失望，兩隊今場入波機會都唔多，但賀芬咸表現更有效率，我哋兩次精神唔夠集中，導致付出代價失波，仲有好多工作要做，以我嘅經驗，需要一段時間處理，我哋必須保持冷靜。」利華古遜下場將作客雲達不來梅，能否及時反彈，大家拭目以待。