格連活特1射2傳　馬賽大勝爆60倍波膽

近期受到內訌問題困擾嘅上季法甲亞軍馬賽終於發威，周六(23日)深夜聯賽主場以5比2大勝新升班球隊巴黎FC，爆60倍波膽，翼鋒格連活特演出神勇，射入1球及2次助攻，老將奧巴美揚亦梅開二度，球隊火力全開。

馬賽上場開鑼戰不敵雷恩，仲有中場拉比奧特同翼鋒莊拿芬路維發生內訌衝突，一齊被「雪藏」掛牌出售。馬賽今仗及時回勇，由格連活特射入12碼打開紀錄，佢之後開出角球，由奧巴美揚射成2比0。

雖然巴黎FC連入2球一度扳平2比2，但奧巴美揚、賀積查治各入1球，再次拉開比數，加上補時格連活特傳畀18歲小將羅賓尼奧華斯射入，贏5比2打開今季勝利之門。

根據《Squawka》統計，奧巴美揚已經喺歐洲5大聯賽累積創造300球，包括射入237球及63次助攻，現時5大聯賽球員之中，僅次於羅拔利雲度夫斯基(453球)、哈利卡尼(340球)、穆罕默德沙拿(329球)，可見呢位36歲加蓬前鋒寶刀未老，沙特豪門艾卡迪沙上月嫌棄奧巴美揚年齡大，同佢提早解約，現時真係走寶。