一戰成名　阿仙奴走法律罅綁實15歲「廠版卡卡」

阿仙奴上場英超以5比0大勝列斯聯，新星麥斯杜文後備入替，以15歲零235日成為英超史上第2年輕上陣球員，並博到12碼，演出非常搶鏡，根據著名體育記者Nicolo Schira爆料，阿仙奴準備提早同呢位英格蘭天才中場簽「準職業合約」至2028年。

阿仙奴主帥阿迪達有心栽培麥斯杜文，今夏「亞洲之旅」熱身賽都帶佢一齊集訓，呢位新星亦交足功課，加上外型俊朗，踢法瀟灑擅長盤球突破，被指有巴西名宿卡卡影子。

麥斯杜文對列斯聯一役，64分鐘後備上陣，以15歲零235日成為英超史上第2年輕上陣球員，僅次於隊友尼華尼利2022年創下嘅紀錄(15歲零181日)，臨完場前，發揮細膩腳法，作個人突破，博到對手犯規，為阿仙奴獲得12碼，「廠版卡卡」之名當之無愧。

麥斯杜文現時只係同阿仙奴簽學徙合約，根據規定，球員必須年滿17歲先至可以簽職業合約，意味麥斯杜文最快等到明年12月生日，先至可以簽約。不過，阿仙奴為綁實呢位球隊未來核心，計劃走法律罅，等佢今年12月16歲生日就提早簽「準職業合約」，希望杜文專心留隊搏殺，防止被其他球會挖角。