一個原因　C朗或唔踢「亞冠盃2」客戰

沙特阿拉伯豪門艾納斯上季聯賽僅獲得第3位，無緣亞冠精英盃，只能踢「亞冠盃2」賽事，根據外媒爆料，艾納斯巨星C朗考慮到「人身安全」問題，可能唔踢9月展開嘅分組賽3場作客。

艾納斯被抽入D組，同組對手有伊拉克球隊艾祖拉、印度球隊FC果阿邦、塔吉克斯坦足球隊伊斯迪洛，C朗嘅團隊認為呢3支球隊所在城市保安問題令人擔憂。其中艾祖拉主場位於伊拉克首都巴格達，當地多年來飽受戰爭、恐襲摧殘，以C朗嘅名氣，如果去當地比賽，好易成為被襲擊目標。

C朗嘅團隊亦擔心印度果阿邦、塔吉克斯坦城市吉薩爾嘅球場保安設施，未能確保呢位葡萄牙國腳安全，認為佢唔適去當地比賽。據悉艾納斯會方基本上接納C朗團隊提出嘅建議，容許佢呢3場作客賽事「免役」，無謂要C朗冒險，導致因小失大。