【有片】勁尷！靚女主播訪問認錯球員
上周六(23日)德甲發生尷尬一幕，法蘭克福主場4比1大勝雲達不來梅賽後，《天空體育》人氣靚女主播Katharina Kleinfeldt搵球員做訪問，但佢竟然將不來梅隊長馬高費度誤當法蘭克福球員，問佢「贏波感受」。
比賽完結後，Katharina搵嚟馬高費度訪問，不過馬高費度當時同法蘭克福球員交換咗波衫，Katharina問：「我哋討論下法蘭克福，先集中場波，你哋贏4比1，係咪你哋預期嘅結果？」費度聽完後微笑一下，望望自己件波衫後回應：「可能你唔知，我係不來梅球員......」
Katharina即時尷尬搭住馬高費度膊頭道歉：「對唔住、對唔住......我只係......馬高，對唔住...係我嘅錯。」Katharina事後解釋：「呢個情況令我好唔安樂，我喺賽前已經喺隊巴訪問過馬高費度，嗰陣我見佢着住法蘭克福波衫，就喺嗰一刻......我錯都離晒譜。希望馬高費度幾日之後可以笑番。」