邦尼菲斯體測肥佬　轉會AC米蘭告吹

意甲勁旅AC米蘭日前同利華古遜達成協議，將會借用尼日利亞前鋒邦尼菲斯，呢位前鋒更已飛去意大利做體測，不過德國《體片報》爆料，AC米蘭對邦尼菲斯嘅傷患史唔放心，交易將會告吹。

據報24歲嘅邦尼菲斯去到米蘭後，進行咗4次體測，但AC米蘭對曾經兩度韌帶重傷，以及近2季經常受肌肉傷患困擾嘅歷史唔太放心，表示要再重新考慮，之前傾好500萬歐元借用費，另加2,400萬歐元買斷條款嘅協議未能兌現。據報邦尼菲斯重返德國後，利華古遜已將交易視為告吹。

邦尼菲斯轉會失敗後，受到唔少球迷攻擊，佢就喺社交網發文反擊：「有人鬧我唔認真對待足球，我效力利華古遜、AC米蘭呢啲大球會都想簽我，咁我如果認真起上嚟，咪可以去木星踢波？周圍都係小丑！如果我唔認真可以有依家嘅表現，咁我應該繼續唔認真。」