國際米蘭狂派5蛋　 捷禾破紀錄省靚招牌

周二(26日)凌晨意甲，上季亞軍國際米蘭主場以5比0大勝拖連奴，取得夢幻開局，一直被指未夠班執教大球會嘅新帥捷禾，以行動省靚招牌，成為國際米蘭史上首位第1次領軍踢意甲，贏到5球或以上嘅教練。

捷禾6月初接替離隊嘅施蒙尼恩沙基，成為國際米蘭主帥，出戰世冠盃，但卻16強出局，呢位44歲羅馬尼亞名宿教波能力備受質疑。不過，國米今季首輪聯賽有出色表現，開賽18分鐘由中堅巴斯東尼頂入角球打開紀錄，跟住前鋒馬古斯杜林射成2比0。

換邊後冇耐，拖連奴防線出錯「送禮」，拿達路馬天尼斯把握機會剷射入網，其後2位入功臣合作，巴斯東尼長傳，馬古斯杜林近門頂入，個人梅開二度，加上後備上陣嘅安治邦尼射入1球，贈拖連奴5蛋。國米今場控球率達60%，有20次射門，其中9次中目標，展現爭標霸氣。