英超之恥！列斯聯12碼全射失　被英冠仔淘汰

周三(27日)凌晨英聯盃第2圈爆出冷門，英超球隊列斯聯作客同英冠球隊錫周三打和1比1，需要互射12碼分勝負，列斯聯3位球員主射竟然全部宴客，被淘汰出局，認真羞家。

錫周三今季英冠3戰只有1和2負，賽前備受睇淡，列斯聯客W熱到只有1.11倍，但開賽後，錫周三反而創造唔少具威脅攻門，包括祖馬路維主射罰球，僅貼柱出界。踢到63分鐘，列斯聯更加「送禮」，祖馬路維喺禁區右路近底線傳中，列斯聯門將卡爾達路「痾蛋」大漏，兼令皮球改變方向入網，變成烏龍波。

比賽末段，列斯聯由積頓保利射入扳平1比1，結果要互射12碼，但射咗3輪已經分出勝負，因為列斯聯球員全部射失，包括比路爾、桑恩朗達夫主射，被錫周三門將艾芬賀華夫撲出，新兵卡維特利雲更加射唔中目標，反觀錫周三球員3射全中晉級第3圈。