幫理不幫親！安察洛堤棄用所有皇馬球員

巴西國家隊主帥安察洛堤公布新一期大軍名單，最令人意外係棄用昔日4位皇馬舊部雲尼斯奧斯祖利亞、洛迪高高斯、安迪歷、艾達米列達奧。至於打甩「假波案」嘅韋斯咸中場盧卡斯柏基達獲得重召，令英超兵成為「森巴兵團」最大勢力。

安察洛堤之所以棄用4位皇馬球員，好大程度上因為各自都有問題，雲尼斯奧斯祖利亞踢國家隊表現差，另外2位前鋒洛迪高高斯、安迪歷僅屬於「銀河艦隊」副選，狀態成疑。唯一較具爭議係中堅艾達米列達奧落選，可能由於佢近年經常受傷，令「肥安」有所顧慮。

巴塞隆拿翼鋒拉芬夏比洛尼成為唯一入選嘅西甲球員，其他國腳大部分效力英超球會，包括曼聯孖寶馬菲奧斯根夏、卡斯米路、車路士前鋒祖奧柏度、新星艾斯迪華奧、阿仙奴前鋒加比爾馬天尼利、熱刺射手李察利臣、利物浦門將艾利臣比加等，但曼城門將艾達臣摩拉斯落選。

巴西將於9月初踢2場世界盃外圍賽對智利、玻利維亞，「森巴兵團」已經取得出線權，安察洛堤屆時可以放心試陣。