急性發錢寒　五大豪門要求世冠盃兩年一度

今屆世冠盃大幅擴軍至32隊，成為「新金礦」，冠軍車路士累積獲得1.1億美元獎金，認真和味。各大豪門希望「加碼」吸金，皇馬率先發起行動，要求國際足協將呢項大賽由四年一度，改為兩年一度，藉以增加球會收入，並已獲得今屆冇份參賽嘅曼聯、利物浦、巴塞隆拿、拿玻里附和。

今屆世冠盃總獎金達到10億美元，當中5.25億美元屬於「包底獎金」，所有參賽球隊都有份瓜分，每次贏波、晉級都有獎金，冠軍車路士、亞軍巴黎聖日耳門都獲得超過1億美元獎。

4強止步嘅皇馬亦有近8,252萬美元進帳，食過番尋味，向國際足協提出建議，將世冠盃改為兩年一度，一齊發大財。曼聯、利物浦、巴塞隆拿、拿玻里無緣參加今屆賽事，錯過「掘金」良機，所以亦支持皇馬嘅建議。

不過，國際足協有所保留，因為現今球壇賽事太頻密，早已為人詬病，各項國際賽事亦已經編排至2030年，國際足協無意2027年增辦世冠盃，但2029年舉行之後，有可能改為兩年一度。