先借後買冇得彈鐘！安東尼脫魔投「迪」在望

曼聯就清走「圓規」安東尼馬菲奧斯一事，終於有新進展，有指近日佢哋同貝迪斯傾掂數，安東尼將以先借後買嘅方式離隊，有望脫魔重生。

安東尼於2022年8月以1億歐元天價，從阿積士加盟曼聯，可惜愈踢愈沉，今年1月底外借去貝迪斯後，獲得重生頻頻建功，仲話加盟貝迪斯係自己一生最佳決定，希望繼續留隊，擺明唔想再留喺曼聯。不過盛傳紅魔要求5,000萬歐元轉會費，令貝迪斯卻步。

隨住今夏轉會窗就快關閉，曼聯都想盡快清走旗下「水貨」，據報紅魔同貝迪斯近日就「圓規」轉會一事，原則上達成協議，就係先借用一季，之後貝迪斯必須強制買斷呢位巴西翼鋒，冇得彈鐘，雖然仍未落實及未有透露轉會金額，但都好事近。