車路士散貨有眉目　「雙鋒」獲豪門接收

車路士今個暑假大事增兵，但賣人方面停滯不前，距離轉會窗關閉剩番幾日終於有眉目，尼高拉斯積遜同尼干古都獲豪門接受，尼高拉斯積遜好大機會加盟拜仁慕尼黑，而尼干古就接近加盟AC米蘭。

權威記者羅曼諾報道，AC米蘭近日加速斟介尼干古，個人條件方面已達成共識，車路士要求3,000萬歐元轉會，兩間球會依家進入最後談判，預計成事機會唔細。

尼高拉斯積遜方面，拜仁慕尼黑希望以借用+明年強制買斷方式進行交易，球員亦已同意轉會，不過車路士目前只剩1個「英超以外外借名額」，而且佢哋打算等待阿歷山大伊沙克嘅去留揭盅，睇下會唔會有其他球會開出更吸引條件，但消息指拜仁對尼高拉斯積遜志在必得，有機會會再提交更好嘅方案，說服車路士放人。