賓施馬同皇馬無法續約　有2個原因

足球博彩神器，每日重心提供盡在《彩報》：http://win.on.cc/football/　

賓施馬上仗西甲連中三元，協助皇馬大炒華拉度列6蛋，但佢同球會續約問題無法解決，西媒報道，原因係皇馬無法滿足賓施馬2個條件，分別係必須保持正選地位，同埋要求加薪，獲得金球獎對應嘅人工。

表面睇賓施馬提出嘅2個條件都好合理，佢仍然係球隊首席前鋒，正選地位理應穩陣，佢去年獲得金球獎，其年薪大約為900萬歐元(約7700萬港元)，仍有加薪空間。

不過賓施馬本身最大障礙係年齡，佢已經35歲，皇馬對於年長球員一向都係逐年更新合約，而且會逐年減薪，賓施馬嘅加薪要求肯定落空，至於保證正選位置就更加冇可能，「老佛爺」皮里茲宗旨係任何球員都唔可以凌駕球隊，C朗都唔可以，賓施馬就更難。

西媒認為，賓施馬只有兩個選擇，一係乖乖續約，另一條路就係約滿離隊。